2012-03-06
အင်းစိန်ထောင်မှာကျန်နေတဲ့ နိုင်ငံရေး အကျဉ်းသားတွေထဲက ၄၄ ယောက်အတွက် အလှူငွေနဲ့ စာအုပ်တွေကို နိုင်ငံရေး အကျဉ်းသားဟောင်းတွေက ဒီနေ့ ထောင်တာဝန်ခံအရာရှိတွေကို သွားရောက်ပေးအပ်ခဲ့ပါတယ်။
အပြည်ပြည်ဆိုင်ရာ လွတ်ငြိမ်းချမ်းသာခွင့်အဖွဲ့မှ ဦးဆောင်ကာ မြန်မာနိုင်ငံမှ နိုင်ငံရေး အကျဉ်းသားများ လွတ်မြောက်ရေး လှုပ်ရှားမှုတခု အဖြစ် ထိုင်းနိုင်ငံ၊ ဗန်ကောက်မြို့ရှိ မြန်မာစစ်အစိုးရ သံရုံးရှေ့တွင် ဆန္ဒပြ တောင်းဆိုနေသည့် မှတ်တမ်းပုံ ဖြစ်ပါသည်။ (Photo: AFP)
တစ်ယောက်ကို ငွေ ၁ သောင်းနဲ့ စာအုပ် ၃ အုပ်စီ ပေးအပ်ခဲ့တာပါ။ အဲဒီလို ကူညီနိုင်ဖို့ နိုင်ငံရေး အကျဉ်းသားဟောင်းတွေဟာ ပြီးခဲ့တဲ့လက ကျိုက္ကဆံဘုရားပွဲမှာ “စည်းချက်ညီ” ဆိုတဲ့ အမည်နဲ့ ရန်ပုံငွေဈေးရောင်းပွဲ ပြုလုပ်ခဲ့သလို အခုလည်း ရွှေတိဂုံဘုရားပွဲမှာ ဆိုင်ခင်းရောင်းချနေပါတယ်။
ဒါ့အပြင် ၈၈ မျိုးဆက်ကျောင်းသားခေါင်းဆောင် ကိုမင်းကိုနိုင်နဲ့ နိုင်ငံရေးအကျဉ်းသားတွေရဲ့ အနုပညာလက်ရာတွေကို ရန်ကုန်မြို့ ပန်းဆိုးတန်းလမ်းက စာပေလောကစာအုပ်တိုက် အပေါ်ထပ်မှာ လာမယ့် မတ်လ ၉ ရက်ကနေ ၁၁ ရက်အထိ ကျင်းပဖို့ ပြင်ဆင်ထားတယ်လို့ သိရပါတယ်။
ဒီအတောအတွင်းမှာပဲ အန်အယ်လ်ဒီလူငယ်တွေ ဖွဲ့စည်းထားတဲ့ BG သွေးကူညီရေးအဖွဲ့ကလည်း ရွှေတိဂုံဘုရားပွဲမှာ ရန်ပုံငွေဈေးရောင်းပွဲ ကျင်းပနေပါတယ်။ အဲဒီကရတဲ့ အမြတ်ငွေကို ရန်ကုန်မြို့ တောင်ဒဂုံမြို့နယ် မြရည်နန္ဒာလမ်းမှာ သူတို့အဖွဲ့က ဆောင်ရွက်နေတဲ့ သက်မွေးဝမ်းကျောင်း ပညာသင်တန်းကျောင်း တိုးချဲ့ရေးအတွက် အသုံးပြုမှာဖြစ်တယ်လို့ BG သွေးကူညီရေးအဖွဲ့ တာဝန်ခံ ကိုညီညီက အာအက်ဖ်အေကိုပြောပါတယ်။
No comments:
Post a Comment